Mkuu wa wilaya ya Muheza Mhandisi Mwanaasha Tumbo akihutubia wananchi wakati wa uzinduzi wa kisima cha maji

Na Hassan Hashim Muheza.

Mkuu wa wilaya Muheza Mhandisi Mwanaasha Tumbo amewataka wananchi waliovamia maeneo ya shamba la LEWA ambalo limetwaliwa na serikali kuacha kupanda mazao ya kudumu hadi utaratibu wa kugawanya shamba hilo utakapokamilika .

Kauli hiyoameitoa wakati akihutubia wananchi katika hafla ya uzinduzi wa kisima cha maji katika kijiji cha Kibaoni kata ya Mtindiro wilayani Muheza.

Amesema lengo la serikali kutwaa shamba hilo ni kuwawezesha wananchi kupata maeneo ya kufanya shughuli za kilimo na ufugaji na kwamba utaratibu wa matumizi bora ya ardhi utakapokamilika watapatiwa maeneo bila upendeleo.

Aidha mkuu huyo wa wilaya amepiga marufuku  vitendo vya ukataji miti na usafirishaji magogo kutoka wilayani humo na kwamba watakaokiuka  watakamatwa wao pamoja na magari yatakayohusika kutaifishwa.

Awali mbunge  wa jimbo la Muheza Adadi Rajabu amesema serikali ipo kwenye mchakato wa kutekeleza mradi mkubwa ambao utaondoa kero ya maji katika wilaya hiyo.

Jumla ya kaya 2000 zitanufaika na mradi huo ambao ujenzi wake umegharimu milioni 48.6 na kufadhilwa na kampuni ya Neelkanth .

…………………………………